Ka khawnung ngaih tuah chiang in, ka lungsim mitkha ah a kong zingte khawng mitsi sa in leng paithei leng kilawm phial di'n ka kigingta; Mun tam zaw-te ah khe nuai a suang lian lou lou hon dou seuh sauh di om hi. Mun khen khat bang ah khe a siik suk chiang bang in leivui bang nip thiah thiah chih theih ding khop in sah hi.Pucca road chih vuak sang in Pucca leivui road chih nop huai ka sa jaw. Lamlian toh kinai deuh a teng te meh kan gim mui nam veng veng diik khin phet bang leng vok ann di paw te zu gim nam fitfit in tuam mang theih zel hun chang bang om hi. Lampai lai bang leng nung lam a pang hong ging luap luap ua, a khaw nung sawt lou chiang in "Eh! vokpi KID te eive ua" chi bang in ngaih tuah vung vung theih hi. A chang in lah vok ek gim in nak vang bang vut teu teu thei hi. Vok in jaw gim hau lua hive aw maw!
Dorcas Hall kong lak bang meh zuak te tu dim sek uh hi. Dorcas hall fencing ah bazar nupi te tutna ding a kibawl shed sau diu deu om sek pen auto parking a na suak ta maimah hi. Restaurant chih khawng Lamka a om ngei lou di I sak leh, Kareh! A nekman zong pe zou di ka maw? Chih nop phial leh kilawm a standard tak bang Lamka ah le chi phet lou in, New lamka mah mah ah le om ta hi. Sianpiak Chow Hotel kan a changkang zaw om ngei lou di I sak leh… Maizen! Thei khial pet mah ka hi mai.
Mi gam a fly over khawng a kichih muh ua leh, ei gam ah bel ROAD OVER kithang mah mah chih di ahi pen mai. Nidang a Gouchinkhup veng paitouh na ana niam tuam suk pen sang touta mah mah hi. Bible a mun kuakte vuk dim unla; lampi kawi-te hih tang un chih khawng bang lung sim ah lang khe dun dun thei sam hi. Tua ziak mah in Damkam bazar bang tum mang dek phial hi. Hiai kia leng hilou in, Nidang a Lailam lui a Lei kidoh sang ven von pen tun ah ana khang niam mawk hi. Salem veng ten len vual zawl na ana tang tei uh chih na himai!
Bazar lam kai suk di bang leng, gari or atleast cycle bek neitei lou te a dia khe a pai keuh keuh sek pek Town bus omlouh tawp in Diesel engine Auto te in kheng khe ta hi. Vaigampur a om kha ngei zek, bus tuan teng a bus tuan man dot na dia khut zung kai zen a, EK, DAW, TEEN, …… chih chih ngai lou in "Cheng Nga" chih suk ziau in veng mai hi. Ka ngaih tuah thak thak chiang in eipau a pau a nop lam ka thei suah thak hi in ka kithei. Neu a pan a Paite pau a pau dak dak gige kihi leh leng, tua mahni pau a pau a khum diak lam chiam kha pan ka hi ding.
Hitler in Mi gam a Mithupi hih sang in, ka pian na gam ah khedap bawl tu a pan ka tel jaw ana chi hi. Vaite agarbatti namse tak nap nap sang in zaw Lamka kholak a leivu khu diik le ka tel jaw.
Lung sim mitkha in vak suk lai le, Nidang a Zion dawr gige bang leng AirTel Dawr ana suak ta maimah hi. Lamlian kiang a Nullah kuak trop tak tak te bang leng foot path hoihtak ana suak ta hi. "Maizen! I gam uh puah di bang tak a puah hileh jaw! 1990's lai khawng a le hiai bang dinmun a na ding ta di hia" chih khawng ka va ngaih tuah ngal louh a dang gen di le ka thei law biik kei. Mun a ngam lou gal a ngam chih mah bang a, a gal a zaw awl moh huai law sam; a mun I va tun hial leh lah hihtheih bang pi le va kinei tuan lou. Ana teng sa sa te toh kikhaih luat a va om lou mai mah. Lampi pai lai khawng le lamlian kiang chil khawng va ki-se khe petpet tei thou. MLA te le bang mah sem kaw dok mah mah lou uh chih peuh va chih num num a om maimah.
Lamlian khawng jaw ana kipuah sam. A him him a lamlian le bang ziak a hichi buai pih tel ki hi a de aw chi mah mah ke. Pucca Road chih sang a, Pucca MicroThin road™® chih dia hoih mah mah a ka.
Comments